السبت، 18 أغسطس، 2012

عندما كنا فى الجنة

بتاريخ 1 ابريل 2012
----------------------
هو وهى قاعدين زى كل ليلة قبل الفجر بتسع او عشر ساعات كده
وهو قاعد يرخم عليها بردو زى كل ليلة
قالها : انا عندى فكرة "مجنونة" اكيد هتعجبك
ردت : ليه "أكيد" يعنى ..تقصد ايه ؟؟ انا فاهماك :@
-لا انا مش قصدى انك مجنونة ولا حاجة لا سمح الله
* بقى كده ؟؟ عموما معادتش تفرق كمل كلام ....
-معلش يا ستى اسمعى بس
*اما نشوف ..ها قول ..
-انا لازم اشوفك دلوقتى حالا !!
*ايه الكلام ده ؟ مش احنا قلنا لسه بدرى ...
-قاطعها وقالها : اسمعى بس انا مش عاوز اشوفك يعنى اشوفك !
* لا والله ؟؟ تصدق اقنعتنى ..
-ايه ده ؟؟ تصدقنى انا اللى غلطان انى برد عليكى ..انا مش قايلك حاجة .
*خلاص معلش ..فهمنى انت بس الروحة عليا خالص
-انا هقابلك فى خيالنا ..غمضى عينك كده
*غمض عينى ايه ؟؟ انت هتنيمنى طغطايسى ولا ايه ؟؟
- طغطاطيسى ؟؟!! اهى عشان خفة دمك دهى انا مرارتى انفجرت منى
*خلاص خلاص انا غمضت ..انت بتزعق ليه ؟
-انا كمان اللى غلطان ؟؟ طيب عموما اتخيلى معايا المشهد ده واوعى تقاطعينى ..انا وانت قاعدين على مكان عالى كده ..هو مش جبل هو زى ما تقولى صخرة كبيرة وفى ورانا شجرة كبيرة اوى ورقها عريض ولونه اخضر اوى و ....
*يعنى ورقها لو مكانش عريض الحلم هيبوظ مننا ؟؟
-يوووه هو حلمك ولا حلمى انا حر ..انا هغير المكان ده عشان تستريحى ..خلينا قاعدين على رمل وورانا نفس الصخرة الكبيرة بس المرة دى قدامنا البحر ..واعتبرينا بالليل والقمر بدر ..ولا اقولك انا بخاف خلينا الصبح والشمس طالعة ؟؟ممممممممممممم لأ لأ خلينا بالليل انا مبخافش من حاجة وانا معاكى ..
*انجز وراك مذاكرة احنا مش فاضيين ..
-متزهقينيش بقى الموضوع كبير وطويل وانا لسه هحكيلك حاجات كتير ..
المهم ..احنا كنا قاعدين بعيد عن بعض اصلنا متخاصمين .
.  ..لأ مش اوى كده اعتبرينى بس كنت راكن راسى على كتفك الشمال ..
-وبعدين سألها : عارفه انا وانت جينا الدنيا ازاى ؟؟
*ايه السؤال ده ؟؟ اكيد يعنى جينا زى كل اناس ..
-طيب عارفة انا اكبر منك بقد ايه ؟؟
* اه هما تقريبا شهرين ؟؟
-لأ اسكتى بقى ده انتى مش عارفه حاجة عننا خالص ..ده احنا قصتنا مختلفة عن كل الناس دى وقديمة اوى كمان اسمعى انا هحكيهالك ..
* ها ارغى وصدعنى (الجملة دى قالتها فى سرها :P)
- هقولك ..فى يوم من زمان اوى اوى ..من كام مليون سنه كده انا مش فاكر بصراحة ..انا كنت ماشى فى الجنه ..مش جنينه .لأ الجنه الجنه الى فيها الفردوس وكده يعنى ..كنت ماشى فى كل مكان عاوز اعرف كل حاجة ليه وطالعة ازاى وبتعمل ايه ..عاوز اعرف الحيوانات والطيور..أصل انا كنت مخلوق من اسبوع بس وكنت عاوز اعرف كل حاجة فى اسرع وقت .
المهم انا تعبت من كتر المشى ونمت شوية جنب شجرة ...
ولما صحيت لقيت نفسى تعبان اكتر من تعبى قبل ما انام !!
قعدت احسس على نفسى كده زى اللى يكون ناقص منه حاجة ..راسى ..رقبتى ..صدرى .. يا خبر ؟؟
لقيت جنبى الشمال ناقص ضلع !!!
* ههههههههههههههههههه يا راجل ؟؟!
-شششششش اسمعى وانت ساكته ..المهم فضلت ادور عليه مفيش اثر ..قلت جايز وحش اكله ..بس بعد شوية حصل حاجة اغرب من كده بكتير ؟؟
* ايه ؟؟
-حسيت ان عندى حاجة فى جنبى الشمال بتضرب جوا صدرى ..انا مكانش عندى حاجة زى كده قبل ما انام ؟؟ يا ترا ايه الى حصل ؟؟
ممكن يكون عصفور دخل جوا صدرى واتحبس جوا ؟؟
* هههههههه ايه يا عم عالم ديزنى اللى انت بتحكيه ده ؟ :P
-اضحكى اضحكى مهو انت لو كنتى مكانى مكنتيش ضحكتى ..بس عارفه ساعة لما الحاجة دى دقت كده انا حسيت ان التعب راح وانى قدرت اتحرك تانى !!!
بس بتحرك كأنى رايح مكان معين وبدور على حاجة معينه
بس انا مش عارف المكان ده ولا عارف انا بدور على ايه
عامل زى ما اكون هايم بس عارف هو عاوز ايه
زى ما اكون فاهم بس مش فاهم فى نفس الوقت
مع انى من الصبح ماشى فى الجنه بس دى اول مرة
احسن انى ماشى لهدف ........
.........................
"بس يا ستى"
* بس ايه ؟؟!!! كمل هو انت هتسيبنى كده ؟؟مش فاهمه حاجة انا مش فاهمه انت بتحكى الكلام ده ليه اصلا ؟
-اه عليكى نور .انا هسيبك كده ..يلا فتحى عينك الحلم خلص ..
*يعنى انت كل مرة كده تسيبنى وتمشى ؟!
-معلش انتى عارفه انى مضطر اصل انا ايدى وجعتنى من الكتابة..اكتبى انت شوية ؟
*بقى كده ؟؟
- اه ..مش انت بتقولى اننا بنحلم نفس الاحلام ؟ طيب كملى بقى لو انت شاطره :P ..
*انا مش هرد عليك وهسيبك بس عشان عارفه انك تعبت ووراك كليه الصبح ..متنساش تصلى الفجر ..
-انا مش هصلى اصل الميه قاطعة :P
*اتوضا ياخويا من البحر اللى احنا كنا قاعدين عنده :P ..يلا افرجت عنك ..
-افرجتى عنى ؟؟ تصدقى انا اللى غلطان انى بكلمك اصلا
*تقدر متكلمنيش ؟؟ وبعدين "يلا" اتفضل ..
-انا عديتلك "افرجتى عنى" بس مش هعديلك موضوع "يلا" ده تانى ابدا..
"يلا" مع السلامة :)
*مع السلامة تصبح وانتا ............... :)
___________________________
*انت جيت -شهقة- يا ...... ؟
-لأ انا لسه مجيتش بصراحة
*طيب لما تيجى ابقى نادى عليا انا مستنياك
-طيب ان شاء الله
............
*انت مبتتكلمش ليه ؟
-اصلى لسه مجيتش :P
*طيب كملى الحلم عشان "خاطر مصر"
-هههههه طالما عشان خاطر مصر يبقى مش قايل حاجة
*يووه بقى ..يعنى لازم استخدم السلاح التقيل
-لأ لأ خلاص انا هتكلم بس كنت عاوز اقولك حاجة ..
* ؟؟
- كنت عاوز اقولك انك المرة اللى فاتت لو قلتيلى "متمشيش" مكنتش همشى وكنت هكملك الحكاية :$
- احم .. طيب يلا غمضى تانى واتخيلى نفس مشهد البحر بالظبط ..احنا كنا بنقول ايه ؟؟ آه .. كنت بقولك انى كنت فى الجنه وماشى لهدف معين بس انا مش عارف هوا ايه ..انا فضلت مكمل مشى لحد ما لقيتك .. بس انا اتخضيت ..لانى بقالى اسبوع ماشى هنا ومش لاقى حد غير الشجر والطيور ..وانت اول حد الاقيه زيى ..
* بقالك اسبوع ؟؟
- اه بقالى اسبوع ..هوانت هنا بقالك قد ايه ؟
*مش هقولك انا مولوده امتى الا لما تجيب ..............
- حتى هنا مش هتقوليلى ؟؟ ههههه بس انا عارف انك لسه جايه الجنة دلوقتى ..يعنى انا اكبر منك باسبوع بس ..
*وعرفت ازاى بقى ؟؟
- ههههه لأ معرفتش بس انا اللى مألف الحلم واناعاوز ابقى اكبر منك باسبوع بس ..وبعدين اكبر منك بيوم يعرف عنك بسنه ...
*بطل لماضه وارحمنى بقى .. طيب قولى ايه اللى حصل بعد كده وخلينا فى الحلم ..
- اقولك؟ انا قبل ما اشوفك كنت خايف من كل حاجة ..حتى الشجر كنت خايف منه تخيلى ؟؟ بس لما شفتك حسيت انى مطمن لكل حاجة ..انت مشفتينيش فى الاول ..انا وقفت بعديد ابص عليكى ..انت كنت تحت شجرة ..ونايمة وتحت راسك مخدمة من مخدات الجنه ..وشعرك كان كله ملموم على بعضه وكان جنب راسك من ناحية الشمال ..بس كان فى شوية شعر على عينيكى عشان كده انت مشفتينيش ..و..و..
*ايه اللى انت بتقوله ده ؟؟:@ ادخل فى الموضوع :$
-بس تعرفى ..انا كنت ماشى نحيتك مليان ثقة ..افتكرتك ملاك ..كنت خايف اصحيكى وانا مبحبش اصحى الملايكه من النوم ..
*بس الملايكة مبتنامش ؟
-ششششش ..لأ بينامو ..مهو انت ملاك وبتنامى ..يبقى الملايكة بردو بينامو ..انا قربت منك وبالراحة حركت الشعر من على عينك ..بس انت متخضيتيش ؟؟ وقلتيلى : "انت اتأخرت ليه ؟" بس قلتيها بثقة وحرارة كده زى ما تكونى عرفانى من زماان اوى !!
فاكره يوم ما كنت بتندهيلى على الجبل ..واضح ان مش دى اول مرة تنادى عليا فيها وآجى متأخر ..انا شكلى بتأخر عليكة من زمان ..
قلتلك : "هوحضرتك هنا من زمان؟ "
* حضرتى ؟؟!! هعديهالك ..بس انا مش عارفه اذا كنت هنا من زمان بس انا مستنياك من ساعة ما انا جيت هنا ..
-انا مش فاهم ؟
لقيتك ضحكتى وحسيت انك بتقوليلى متقلقش انا جنبك وهفهمك كل حاجة .. (واضح ان مشاكل الفهم دى عندى من زمان :P)
-عارفه من غير ما تسألينى لقيت نفسى بحكيلك كل حاجة عملتها فى الجنه قبل ما اشوفك ..حتى حكيتلك اللى حصلى وانا نايم ..
*ابتسمتى وقلتيلى : "متخفش انا اتخلقت من ضلعك ده"
-يعنى ايه ؟؟
*يعنى انا جزء منك ..وعارف ايه حكاية الحاجة اللى بتدق جواك دى ؟
- ايه ؟
*انا لما صحيت هنا ..لقيت جوايا حاجة بتنبض بسرعة وجامد اوى ..انا سميته "القلب" "على فكرة" ..انا دعيت ربنا انه يقسمو بينى وبينك :$ ..انت زعلت ؟؟
-آه ..يعنى تاخدى منى ضلع وتدينى مكانه حاجة بتوجعنى ؟
*انا ؟؟ انت دايما ظالمنى كده ؟ انا عارفه انه جديد عليك ..بس طول ما انا جنبك هعرفك هوبيعمل ايه ..ومش هخليه يوجعك تانى ابدا ..اصل قلبك هو قلبى ..يعنى لو قلبى وجعك هيوجعنى انا كمان ..فاهمنى ؟؟
وبعدين اذا كنت انا كلى منك وانت نص قلبى معاك ..تفتكر هزعلك ..المهم بس انت اللى متوجعش قبلى اللى جوالك ده :)
-هقولك حاجة بره الحلم :دلوقتى بس انا ليه بحب انك تمشى دايما على شمالى ..عشان انا ابقى قريب من ضلعى وانت تبقى قريبةمن قلبك :$) ...فاكره لماكنت ماشيين فى الشارع ....انا كنت دايما مخليكى على شمالى .. وكمان عرفت انا ليه بحس بكل حاجة انت حاسه بيها ..مش قلبك جوايا ؟؟ :$
*فى الحلم : طيب انت اسمك ايه بقى ياللى اخد نص قلبى ؟
-انا مليش اسم !
*لأ لازم يكون لك اسم ..
-اصل انا كنت عايش هنا لوحدى ومكانش حد بينادى عليا يعنى مكنش ليا اسم ..
*طيب دلوقتى انت مش لوحدك ..و..
-هههههههه مش بقولك انت دايما "بتشوفى الحاجات بطريقة مختلفة"
* اسمع انا هسميك "أمل" ...
-يعنى ايه الاسم ده ؟؟
*امل يعنى الامل ..
-يعنى ده شجرة ولا عصفور ولا ايه ..قوليلى هو شبه ايه وانا هعرفه علطول ..
*(هنا انت اخدتى بالك انى كنت بشوف الحاجات المحسوسه بس ومكنتش افهم المعانى المجردة دى) ..بضحكتى وقولتيلى .."انت مش فاهم حاجة كده خالص" الامل ده حاجة تفهمها بقلبى اللى جواك ..الامل ده يا سيدى يعنى الرجاء والحلم والطموح والدعاء والمستقبل وووو (وفضلتى تفهمينى فى اسمى لحد ما بدأ اشغل قلبك اللى جواايا كويس
-طيب انا عاوز اسميكى اسم ..انا هسميكى "أ.." والغريبة انك فهمتيه على طول ومحتاجتيش انى افهمهولك :)
وبعدين سندتى على ايدى وقمتى ..زى ما انا قمت بقلبك لما كنت نايم ..
قضينا ايام حلوة فى الجنه (حذف للرقابة :P)
وبعدين طلعتى بفكرة مجنونة بس عجبتنى ..
* ايه رأيك لما نجرب الارض ؟
-ايه الارض دى ؟
*دى المكان اللى بره سور الجنه ..انتت مشفتوش بس انا متأكدة منه تعالى نجربه ..
-بس مش احنا مستريحين هنا ؟
*انا عاوزة اجرب معاك كل حاجة فى كل مكان ..المهم ابقى معاك ..حتى لو هنسيب الجنه شوية ؟
-شوية ؟؟
* اه متخافش احنا هنرجع الجنه تانى مع بعض
- عارفه ؟؟انا مش فاهم اللى انت بتقوليه كويس بس طالما انا معاكى يلا نجرب كل حاجة ..وبعدين يا ستى نزلنا الارض ..
وتهنا من بعض بس اتقابلنا تانى وادينا بنتكلم اهو ..بس معرفش ليه انا بحب ارخم عليكى كأننا مولودين على روس بعض ..مع اننا مخلوقين من بعض ؟؟
* ههههههه .. طيب احكيلى عملت ايه فى الفترة اللى كنت تايه فيها ؟
-(انا حبيت اغيظك ) فقلتلك : "انا لقيت على الارض كائنات اسمها "بنات" شبهك ..
*شبهى ؟؟
-(انا "بعك" باين ) احم ..لأ مفيش حد شبهك ..هما بيحاولو يبقو شبهك بس معرفووش ولا يقدروو اصلا ..
*"يا بكااااش" :@:$ ...طيب عارف ..انا سمعت اننا لما هنرجع الجنه تانى هيكون فى "حور عين" هو انت هتبصلهم وتسيبنى ؟؟:(
- هههههههههه قلتلك :"ولا حتى حور العين "
* :$
احم ايه الحلم ده ..الحاجة الوحيدة اللى صح فى الحلم هى "انك مش فاهم حاجة خالص " وبعدين انت "بكااش اوى على فكرة اصلا "
انا بكره هحكيلك اللى حصل بجد مش هألف زيك كده ...
-طيب احكيلى دلوقتى ..
*هههههههه لأ مش هحكى ..سامع ؟؟
-ايه ده ؟؟
*ده الفجر :)
-هو الفجر ده مستقصدنا ولا ايه ؟؟ ده ناقص يفضل يدن بدرى كل يوم لحد ما نلاقيه بيدن العشا ..وبعدين احنا فى فرق دقيقتين يعنى انا مش هقوم الا بتوقيتنا ..
* :$)
-ده الفجر
*آه هو فعلا :)
-طيب يلا نصلى :))))

هناك 8 تعليقات:

  1. الفتاه كالزهره ...كالجوهره لابد من حمايتها

    ردحذف
  2. انا تعبت من القراءه
    بس الصراحه تقال الرومانسيه عندك بقالها سنه وهى عاليه
    و عجبتنى... "دلوقتى بس انا ليه بحب انك تمشى دايما على شمالى ..عشان انا ابقى قريب من ضلعى وانت تبقى قريبةمن قلبك"

    ردحذف
  3. تدوينة دمها خفيف ورغم انها طويلة لم اشعر بالملل وانا بقراها

    ردحذف
  4. اخجلتم تواضعنا :D
    هى المفروض كانت جزئين بس انا قلت ازهق الناس ..
    شكرا :)

    ردحذف
  5. برئ
    رغم وجود اجزاء كتير ملهاش لازمة ف نص النص (بالظبط زي الحياة ). الا انها ليها لازمة
    النص مفعم بحيوية الشباب

    ردحذف

اترك رسالتك لا تنتظر سماع الصفارة !